الخواطر التالية تُلخّص تجربتي مع لعبة فلاپي بيرد التي دامت ثلاثة أيام
*اليوم الأول*
"وشذا اللعبة المخيسة؟ أصلا لو أنا عصفور ما قعدت أطير بين مواصير" -انطباعي بعدما عجزت أتعدّى ليفل 3 في فلاپي بيرد
*****
*الساعة ١١ مساءا*
أنا١: أنا٢.
أنا٢: هاه؟
أنا١: يالله خل ننوم ورانا دوام بكرة.
أنا٢: طيب شوي بس بأساعد ذا الحمامة تطير بين المواصير.
أنا١: طيب.
*بعد ٥ دقايق*
أنا٢: أنا١.
أنا١: هلا.
أنا٢ خلاص قضيت لو بتطفي النور.
أنا١: قم طفه إنت. الحين قاعد أحتريك وبعدين تبيني أنا أطفي النور؟
أنا٢: أنا ما عندي مانع أقعد, الحمامة تحتاج مساعدتي.
أنا٣: بتطفون النور ولا شلون؟ ورانا دوام؟
أنا١: ذا الغبي ما يبي يطفي النور.
أنا٣: يا ليل! والله ما أطفيه. أنا كل يوم أطفيه!
*الكهرباء تنقطع عن العمارة*
*أنا١,٢,٣ يتنفسون الصعداء*
"الحلول الصعبة هي السهلة أحيانا" - حكمة أنا قلتها بس حطيتها بين علامات تنصيص عشان تصير كشخة
*اليوم الثاني*
ودّي أمسك اللي مخترع فلاپي بيرد وأطقّه وأفقع وجهه وأصفقه كفوف وأحشره بين ماصورتين وبعدين أحط عليه لوحة مكتوب عليها "قيم اوفر ليفل 0"
أببرد تسبدي
*****
أنا٢: تعبان ياخي.
أنا١: أحسن, قايل لك خل نرقد أبكر أمس.
أنا٢: وهل ينفع البكاء على المرق المسكوب ياخي؟ خلاص.
أنا١: ترى بنرقد الساعة ٩ اليوم.
أنا٢: هههههههه لا يكثر يالدجاجة. قم قم شف فيه بيضة تحتك. هههههههه.
أنا٤: من جد, بيضحكون عليك حقين الپاث.
أنا١: يضحكون ولّا يقعدون. أصلا أنا إذا نمت يصير فَكَك الجو.
أنا٣ مقاطعا خير سير المحادثة: ترى منب مطفي النور.
أنا٢: كل **. إنت أحد كلمك؟
أنا١: ماش من بديت تلعب فلاپي بيرد وانت متغيّر علينا. أول حليل وتقوم تطفي النور. الحين ما غير تنافخ.
أنا٢: كل ** إنت بعد. مسوي لي فيها عريف الفصل "ارقد بدري" وَ "لا تلعب" بسوي اللي أبي!
*ساوندتراك درامي*
*****
لعبت فلاپي بيرد فترات ممددة اليوم آند وت آي هاڤ تو شو فور ات انّو ماي بست سكور صار ٣٧ بدل ٣٥.
تايم ول سپينت -_-
*اليوم الثالث*
تخيّل يهبط عالأرض كائنات فضائية مسالمة متطورين تكنولوجيا أكثر مننا ونتعرف على بعض ونصير أصدقاء وبعدين يتعرفون على ثقافتنا ويطيحون على فلاپي بيرد وتـ** معهم يتنرفزون وبعدين يضفون عفشهم ويقولون: وين أحسن واحد يلعب عندكم؟ ويجيبونه ويقولون: بنخليك تلعب وطالما إنت تلعب وما تموت الأرض في سلام بس لمّا تصقع ماصورة وتموت فيه قنبلة بتنفجر وتمحي الكوكب من الوجود! ويبدأ هالشخص اللعب ويصقع في أول ما صورة!
صح إن كلنا بنموت بس أحس مرة بيضحك الموقف!
*****
أنا١: أنا٢.
أنا٢: هاه.
أنا١: أنا وأنا٣ وأنا٤ نحتاج نصارحك في موضوع.
أنا٢: وش تبون؟
*ساوندتراك مسلسل خليجي حزين*
أنا١, ٣, ٤ الخ يطالعون في بعضهم وأنا٤ يقول: نحتاج نقول لك إننا موجودين هنا عشانك وحنّا نحبّك وراح نوقف معك لو وش يصير.
أنا٢: سلمات يغلي هههههه شالسالفة؟
أنا٤: إدمانك خرّب حياتك وحياتنا. لازم يوقف عند حدّه!
أنا٢: وشو ادمانه؟
أنا١: فلاپي بيرد.
أنا٢: هههههههههههههه مسوين لي فيها انترڤنشن ولازم نصارحك وحنّا نحبّك. كلوا ** كلكم.
أنا١: حنّا ألريدي مسحنا اللعبة من الجوال واللعبة راح تنمسح من الپلي ستور وما راح تقدر تنزلها بعدين.
أنا٢: من جدكم؟!؟!؟؟!؟
أنا٤: إيه وحجزنا لك في مشفى إعادة تأهيل حتّى تتشافى من إدمانك.
أنا٢: لاااااا.
*يحاول أنا٢ التشابك بالأيدي مع البقية ولكن الجميع يتكالبون عليه ويثبتونه ويسحبونه للسيّارة*
*تشتغل السيّارة وتُغادر وصوت صرخات أنا٢ يضعف تدريجيّا*
أنا٣: سوفَ نفتقد أنا٢.
أنا١: كل ** إنت بعد. ما صدقنا نفتك منه!
*النهاية*
ليست هناك تعليقات:
إرسال تعليق